Atje ku dështuan ekipe si Arsenal dhe Inter Milan, Botafogo ia doli në mënyrë të pabesueshme, pasi gjigantët brazilianë i shkaktuan PSG-së humbjen e parë që kur u shpallën kampionë të Evropës më 19 qershor.
Edhe pse goli i fitores nga Igor Jesus në minutën e 36-të u devijua nga Willian Pacho dhe e la Gianluigi Donnarumman të pafuqishëm, PSG nuk tregoi aspak egërsinë e zakonshme në asnjërën anë të fushës.
Në fakt, portieri i Botafogos, John Victor, përballoi vetëm dy goditje në portë nga PSG – numër i barabartë me atë që përballoi David Raya në ndeshjen e Ligës së Kampionëve kundër tyre në tetor.
Pas kësaj humbjeje befasuese, PSG që ndodhet në vendin e dytë nuk ka më mundësi të dalë në krye të grupit, por falë avantazhit në ndeshjet direkte kundër Atletico Madrid, do të sigurojnë kalimin në fazën tjetër nëse arrijnë një rezultat më të mirë se Atletico ndaj Botafogos.
Përfundimi në vendin e dytë mund të çojë në një përballje emocionuese kundër Lionel Messit dhe Inter Miamit në 1/16 e finales – nëse skuadra amerikane e përfundon grupin e vet në vend të parë – por PSG duhet fillimisht të lërë pas krizën, pasi nuk shënoi gol për herë të parë pas 20 ndeshjesh.
Ndërkohë, për Seattle Sounders shpresat janë thuajse të shuar. Pas humbjes 3-1 ndaj Atletico Madrid, ata janë shumë pranë eliminimit.
Pablo Barrios shkëlqeu me dy gola, ndërsa Axel Witsel shënoi me kokë për skuadrën spanjolle. Goli i Albert Rusnak dha një rreze shprese për vendasit, por u zhduk shpejt nga Barrios me golin e dytë të tij.
Seattle ndodhet në fund të Grupit B me zero pikë dhe tani ka nevojë për një mrekulli: të mposht PSG-në, të shpresojë që Botafogo të mundë Atletico Madridin dhe të përmirësojë golavarazhin në ndeshjet direkte për të kaluar më tej në rast të një barazimi me tre skuadra me nga tre pikë.
Vetëm një mrekulli mund ta mbajë në garë ekipin e trajnerit Brian Schmetzer, por me mbi 50 mijë tifozë që pritet të jenë sërish në stadiumin Lumen Field, Seattle do të përpiqet të largohet me dinjitet.
