Duke synuar të mbyllin punën dhe të sigurojnë vendin në finalen e Europa League, Manchester United pret Athletic Bilbao në “Old Trafford” të enjten mbrëma, në ndeshjen e dytë gjysmëfinale.
Djajtë e Kuq e kanë vendosur veten në një pozitë të favorshme për t’u rikthyer në “San Mames”, ku do të zhvillohet finalja e këtij sezoni, pasi fituan 3-0 ndeshjen e parë në tokën baske.
Athletic Bilbao i kishte fituar të gjashtë ndeshjet e këtij sezoni të Europa League në shtëpi dhe nuk kishte pësuar humbje në “San Mames” për më shumë se tetë muaj në të gjitha garat, përpara se Man United të vinte dhe të merrte një fitore të thellë e të papritur, duke përfituar edhe nga ndëshkimi me të kuq i një lojtari vendas. Golat e Bruno Fernandes (2) dhe Casemiro në pjesën e parë vendosën fatin e ndeshjes.
Man United mbetet i pamposhtur këtë sezon në Europa League (8 fitore, 5 barazime) dhe mund të bëhet vetëm skuadra e shtatë – dhe e dyta angleze pas Chelseat në sezonin 2018-19 – që arrin në finalen e këtij kompeticioni pa humbje. Megjithatë, trajneri Ruben Amorim ka këmbëngulur se gjithçka mbetet e hapur, duke theksuar se “çdo gjë mund të ndodhë në një ndeshje”.
Pas fitores së tyre më të thellë jashtë fushe në një gjysmëfinale evropiane, United u kthye në realitet në fundjavë, duke humbur 4-3 ndaj Brentford në një ndeshje plot emocione në “Gtech Community Stadium”, ku Amorim aktivizoi formacionin më të ri në moshë në historinë e Premier League për klubin.
Të ndodhur në vendin e 15-të të Premier League dhe me 16 humbje në 35 ndeshje, Man United është i garantuar të mbyllë sezonin me totalin më të ulët të pikëve në epokën e Premier League (aktualisht me 39 pikë) dhe nuk mund të ngjitet më lart se vendi i 12-të. Prandaj, suksesi në Europa League është thelbësor për të siguruar pjesëmarrjen në Ligën e Kampionëve për sezonin 2025-26.
Një statistikë inkurajuese për United është se të gjitha 133 skuadrat që kanë fituar ndeshjen e parë jashtë fushe me tre ose më shumë gola në një fazë me eliminim direkt të Europa League/UEFA Cup kanë kaluar më tej – pa përjashtim. Djajtë e Kuq janë gjithashtu të pamposhtur në 11 ndeshjet e fundit të Europa League në “Old Trafford” që nga humbja 1-0 ndaj Real Sociedad në shtator 2022.
Athletic Bilbao, ndërkohë, nuk ka arritur në një finale evropiane që nga sezoni 2011-12 dhe ka përpara një mal për të ngjitur në “Old Trafford” nëse dëshiron të shkojë në finalen që do të luhet pikërisht në stadiumin e tyre. Në frontin vendas, rrezikojnë ta mbyllin sezonin me zhgënjim, pasi një vend në top katërshe në La Liga nuk është aspak i sigurt.
Vetëm pesë fitore në 14 ndeshjet e fundit të kampionatit për skuadrën e Ernesto Valverdes kanë bërë që Villarreal – në vendin e pestë – të afrohet vetëm tre pikë larg me katër ndeshje të mbetura. Fundjavën e kaluar, Athletic barazoi 0-0 me Real Sociedad në transfertë, duke goditur vetëm një herë kuadratin në 90 minuta.
