Pas një humbjeje të rrallë tre ditë më parë, Paris Saint-Germain u rikthye me fitore të martën, duke siguruar kalimin në fazën me eliminim direkt me një fitore të lehtë 2-0 ndaj Seattle Sounders.
Fitorja e Atletico Madrid ndaj Botafogos – skuadra që mundi PSG-në në ndeshjen e dytë – bëri që “Les Parisiens” të fitonin Grupin B me gjashtë pikë. Megjithëse u mundën nga kampionët e Brazilit, skuadra e Luis Enrique kishte nisur turneun me një fitore të thellë 4-0 ndaj Atleticos.
Pa pasur nevojë të shfaqnin maksimumin e tyre, ata vazhduan të dominojnë në stilin e zakonshëm, me një mesatare prej 73% të zotërimit të topit në tri ndeshjet e grupit, dhe me gola të ardhur nga lojtarë të ndryshëm. Gjashtë futbollistë të ndryshëm kanë shënuar gjashtë golat e tyre, ndërsa dhjetë të tjerë kanë goditur portën të paktën një herë.
Në prapavijë, ata kanë pësuar vetëm një gol në pesë ndeshjet e fundit – një nga Igor Jesus ndaj Botafogos – pas fillimit të kësaj serie me fitoren 3-0 në finalen e Kupës së Francës.
Pas një triplete historike që përfshiu Ligue 1, Champions League dhe Kupën, PSG është e vendosur të shtojë një tjetër trofe në vitrinë duke fituar versionin e ri të Kupës së Botës për Klube.
Fitorja e radhës të dielën do t’i çonte ata në çerekfinale, ku do të përballen me Bayernin ose Flamengon, ndaj nuk ka vend për ndjenja kur miq të vjetër ribashkohen në Atlanta.
Tetë vite më parë, PSG pësoi njërën nga humbjet më të rënda në Europë, kur një Barcelonë me Lionel Messin, Luis Suarezin, Sergio Busquetsin dhe Javier Mascheranon i shkatërroi në “Camp Nou”. Këtë fundjavë, Mascherano do të drejtojë ish-bashkëlojtarët e tij si trajner i Inter Miami.
Natyrisht, Luis Enrique ishte trajneri i asaj skuadre të mrekullueshme të Barçës – fituese e Kupës së Botës për Klube më 2015 – dhe tani përballet me 38-vjeçarin Messi, dikur ylli i tij.
Kur argjentinasi u largua nga Franca drejt Miamit, pak do të kishin parashikuar që këto dy klube do të përballeshin në një ndeshje zyrtare, por zgjerimi i turneut nga FIFA i ka vendosur PSG-në dhe Inter Miamin përballë në fazën e 1/16-ave.
