E shtuna shënon fundin e periudhës së dytë – dhe me shumë gjasë të fundit – të Carlo Ancelottit si trajner i Real Madridit, me Los Blancos që presin Real Sociedadin në “Santiago Bernabeu” për ndeshjen e fundit të sezonit në La Liga.
Real Madridi do ta përfundojë kampionatin si nënkampion i Spanjës, ndërsa një sezon zhgënjyes për Real Sociedadin i ka lënë ata në vendin e 11-të, pa ndonjë mundësi për pjesëmarrje në Evropë gjatë sezonit 2025-26.
Klubi madrilen fitoi Superkupën e Europës në gusht, por ky do të jetë trofeu i vetëm i sezonit 2024-25, pasi dështuan në të gjitha kompeticionet e tjera: La Liga, Liga e Kampionëve, Kupa e Mbretit dhe Superkupa e Spanjës.
Vetëm katër pikë i ndajnë nga Barcelona në tabelë, prandaj nuk ka qenë një sezon dominues për katalanasit, por ata gjithsesi kanë qenë skuadra më e mirë në elitën e futbollit spanjoll këtë vit.
Forma e Madridit gjatë këtij sezoni është vënë shpesh në pikëpyetje, pasi skuadra nuk ka arritur nivelin e sezonit 2023-24, që përfundoi me një dopietë të lavdishme në La Liga dhe Champions League.
Ancelotti do të largohet zyrtarisht të dielën, ndërsa pasardhësi i tij pritet të jetë Xabi Alonso, i cili do ta udhëheqë skuadrën në Kupën e Botës për Klube që nis më 18 qershor me sfidën ndaj Al-Hilal nga Arabia Saudite.
Ndeshja e kësaj fundjave do të ketë edhe një ndjesi të veçantë, pasi Luka Modric do të luajë për herë të fundit në “Bernabeu” me fanellën e Real Madridit, me largimin e tij që u konfirmua të enjten.
Nga ana tjetër, Real Sociedad, që sezonin e kaluar përfundoi në vendin e gjashtë, do ta mbyllë këtë kampionat në vendin e 11-të – pozicion më i dobët se vendi i nëntë vetëm për herë të dytë që nga viti 2015 – duke e bërë këtë një sezon për t’u harruar për skuadrën baske.
