Ish-sulmuesi i Kombëtares shqiptare, Altin Rraklli, ka dhënë një këshillë të veçantë për trajnerin Silvinho përpara sfidës me Serbinë. Në një lidhje video për “Sport News”, Rraklli theksoi se kjo ndeshje është shumë më tepër se një takim futbolli, pasi emocionet janë të jashtëzakonshme, sidomos për tifozët.
“Ky është një moment për tifozët, ata e ndiejnë fortë këtë ndeshje. Më pyeti një mik pse nuk do të vijë në stadium për këtë përballje, por unë i thashë se këtë herë duhet të jetë plot stadiumi me mbështetësit tanë. Sfida në Beograd u prish nga droni, por ajo që bëri publiku serb nuk duhet të ndodhë kurrë, edhe pse jemi fqinj e kundërshtarë, futbolli duhet të jetë më shumë se konflikte,” tha Rraklli.
Në aspektin sportiv, ish-sulmuesi ishte i prerë: “Kjo ndeshje duhet fituar me çdo kusht. Fitorja do të na japë shanse reale për kualifikim, ndërsa barazimi nuk është dështim, por nuk mjafton për aspiratat tona.”
Sa i përket formacionit, Rraklli sugjeron një ndryshim në mënyrën se si Siylvinho mund të paraqesë ekipin: “Mendoj se duhet të luajmë me tre sulmues. Nuk jam i sigurt nëse Asani duhet të jetë në krahun e djathtë. Unë do të preferoja Armando Brojën dhe në majë të sulmit Mirlind Dakun, dy futbollistë të rinj me potencial të madh që mund të çajnë mbrojtjen serbe. Në krahun tjetër, do të vija Nedim Bajramin.”
“Moduli me tre sulmues është ideal për ne tani. Nëse Silvinho e ka dashurinë për Asanin, atëherë do të luajë, por unë besoj te kjo formulë me Daku në qendër dhe Broja e Bajrami në krahë. Kam besim te sulmi ynë dhe jam i sigurt që do të fitojmë, edhe me rezultatin 1-0,” përfundoi Rraklli me optimizëm.
Në këtë prag sfide, fjalët e Altin Rrakllit ngjallin shpresë dhe dëshirë për sukses te Kombëtarja, që kërkon të marrë pikët e rëndësishme ndaj rivalëve historikë serbë.
