FIFA ka bërë një ndryshim të rëndësishëm në mënyrën e funksionimit të sistemit VAR për pjesën e mbetur të Kupës së Botës, pas kritikave dhe ankesave për nivelin e arbitrimit gjatë turneut.
Deri para çerekfinales mes Francës dhe Marokut të enjten, të gjitha vendimet e VAR-it në këtë Kupë Bote merreshin nga Qendra Ndërkombëtare e Transmetimit (IBC) në Dallas, Teksas.
Megjithatë, sipas protokollit të ri, FIFA do të vendosë në stadium një zyrtar kryesor të VAR-it dhe një zyrtar rezervë të VAR-it, me qëllim që të minimizohen problemet e mundshme teknike me lidhjen me qendrën në Dallas.
Për ndeshjen Francë – Marok, uruguaiani Leodan Gonzalez ishte i pranishëm në stadium për të ofruar mbështetje për arbitrat në rast se do të kishte probleme me lidhjen me qendrën e FIFA-s në Dallas.
Ndërkohë, Tatiana Guzman nga Nikaragua ishte caktuar si zyrtare rezervë e VAR-it në stadiumin e Bostonit.
Ata u bashkuan me një ekip arbitrash tërësisht argjentinas, të përbërë nga arbitri kryesor Facundo Tello dhe ndihmësit Juan Pablo Belatti dhe Gabriel Chade.
Vendimi i FIFA-s për të zbatuar këtë ndryshim vjen pas disa ndeshjeve shumë të debatueshme në fazën e 1/16-ës së finales, përfshirë fitoren me përmbysje të Argjentinës ndaj Egjiptit.
Trajneri i Egjiptit, Hossam Hassan, akuzoi arbitrin francez Francois Letexier për anshmëri në favor të Argjentinës.
“Arbitri është i padrejtë. Më mjafton Zoti dhe Ai është mbrojtësi më i mirë. Ai po e shkatërron mundin e një kombi të tërë. Kjo Kupë Bote po drejtohet drejt Argjentinës,” deklaroi Hassan pasi Argjentina përmbysi rezultatin nga 0-2 në 3-2.
“Kjo ishte qartazi një ndeshje e manipuluar dhe e gjithë bota e pa”, tha ai.
Edhe sulmuesi egjiptian Mostafa Ziko ndau të njëjtin mendim.
“Arbitri nuk ishte i mirë, ishte i padrejtë. Padrejtësia e tij ishte e qartë. Na persekutoi që nga fillimi i ndeshjes. Ai nuk donte që ne të fitonim”, tha ai.
Edhe trajneri i Anglisë, Thomas Tuchel, kritikoi arbitrimin pas fitores së skuadrës së tij ndaj Meksikës në fazën e 1/16-ës.
“Nuk është mjaftueshëm mirë,” tha Tuchel pas kartonit të kuq të Jarell Quansah.
“Ai (arbitri) mund ta lërë çdo skuadër me një lojtar më pak në çdo moment. Nuk është në nivelin e duhur. Vendimet janë të paqëndrueshme dhe të paparashikueshme. Tani kemi edhe dy arbitra të katërt që të bërtasin sapo nxjerr një këmbë jashtë zonës teknike. Kjo nuk është e pranueshme”, tha ai.
Nga ana tjetër, shefi i arbitrimit në FIFA, Pierluigi Collina, mbrojti publikisht gjyqtarët që drejtuan ndeshjet e fazës së 1/16-ës.
“Sigurisht që diskutimet konstruktive për vendimet do të jenë gjithmonë pjesë e futbollit, por akuzat e pabazuara nuk kanë vend në sportin tonë. Askush nuk mund ta vërë në dyshim integritetin e arbitrave të Kupës së Botës. Kur ndodh kjo, mund të shkaktojë reagime që çojnë deri te kërcënimet ndaj tyre dhe familjeve të tyre. Kjo nuk është e drejtë. Po ashtu, askush nuk mund të pretendojë se arbitrimi i FIFA-s mund të ndikohet nga dikush, madje as nga presidenti i FIFA-s”, tha Collina./GazetaExpress/
