Barcelona pret Atletico Madrid në Camp Nou të mërkurën mbrëma, në ndeshjen e parë të çerekfinales së Champions League.
Dy skuadrat u përballën edhe të shtunën në La Liga, ku Barcelona fitoi me një gol të vonshëm nga Robert Lewandowski, duke u shkëputur me 7 pikë në krye të tabelës.
Parashikimi i ndeshjes
Dy përballjet e fundit mes Barcelonës dhe Atletico në çerekfinale të Champions League kanë përfunduar me eliminimin e katalanasve, në sezonet 2013-14 dhe 2015-16.
Barcelona ka fituar vetëm një nga katër ndeshjet e fundit evropiane ndaj Atletico, duke shënuar vetëm tre gola, por në përgjithësi ka fituar 5 nga 6 përballjet e fundit mes tyre në të gjitha garat, përfshirë fitoren 2-1 në fundjavë.
Barcelona kryeson La Liga me 7 pikë diferencë ndaj Real Madrid dhe konsiderohet favorite për këtë përballje, por skuadra e drejtuar nga Hansi Flick e di që Atletico është kundërshtar shumë i rrezikshëm.
Në 1/8 e finales, Barcelona dominoi totalisht Newcastle duke fituar 8-3 në total, përfshirë një fitore 7-2 në ndeshjen e kthimit në shtëpi.
Barcelona është pa humbje në të gjitha garat prej gati dy muajsh dhe ka një nga sulmet më të forta në Evropë, me talentin Lamine Yamal që po kalon një sezon fantastik.
Nga ana tjetër, Atletico vjen në këtë ndeshje pas tre humbjeve radhazi, përfshirë edhe humbjen ndaj Barcelonës në fundjavë.
Skuadra e drejtuar nga Diego Simeone është e katërta në La Liga, me 12 pikë avantazh ndaj vendit të pestë, kështu që fokusi kryesor është Champions League dhe finalja e ardhshme e Copa del Rey ndaj Real Sociedad.
Atletico humbi 3-2 ndaj Tottenham në ndeshjen e kthimit në 1/8 e finales, por kaloi tutje me rezultat të përgjithshëm 7-5.
Sezonin e kaluar u eliminua nga Real Madrid në këtë fazë, dhe nuk ka arritur më larg se çerekfinalet që nga sezoni 2016-17.
Atletico ka humbur 4 ndeshje në Champions League këtë sezon, por prania e tyre në çerekfinale tregon forcën e tyre dhe përvoja ndaj Barcelonës në këtë kompeticion mund t’u japë besim.
