Chelsea do të udhëtojë vetëm pak minuta larg nëpër Londrën Perëndimore këtë të shtunë, kur do të përballet me Brentford në Premier League, në derbin e katërt të sezonit.
Skuadra e Enzo Marescës nuk ka lënë kryeqytetin deri tani, dhe kjo u ka shërbyer mirë, pasi fundjavën e nisin në vendin e dytë të renditjes.
Blutë rikthehen në fushë pas fitores së diskutueshme ndaj Fulham, ku fituan 2-0 në “Stamford Bridge” mes vendimeve shumë të kontestuara – një gol i anuluar i Fulham dhe një penallti e dhënë për Chelsean në pjesën e dytë.
Megjithatë, më e rëndësishmja ishin tre pikët e radhës, të cilat e ruajnë serinë e pamposhtur të Chelseat në shtëpi në Premier League gjatë vitit 2025, me nëntë fitore dhe tre barazime në 12 ndeshje.
Kjo gjithashtu përfaqëson një nga startet më të forta në vite për londinezët, pasi vetëm për herë të dytë në shtatë sezone ata kanë fituar të paktën dy nga tri ndeshjet e para të kampionatit.
Një tjetër statistikë pozitive ishte edhe ndeshja e nëntë pa pësuar gol në 15 takime, një tregues i rëndësishëm për Marescën, duke pasur parasysh kritikat e mëparshme mbi mbrojtjen e Chelseat.
Kjo formë mbrojtëse do të jetë vendimtare, pasi Blutë përballen me një javë të ngarkuar me tri ndeshje jashtë fushe – përfshirë transfertat e rënda ndaj Bayern Munich dhe Manchester United.
Nga ana tjetër, historia e shkurtër e këtij dueli favorizon Chelsean, pasi në tetë ndeshje mes tyre, vetëm një herë ka fituar skuadra pritëse.
Kështu, edhe pse Brentford pritet të luftojë fort para tifozëve të vet, Chelsea shkon në “Gtech Community Stadium” me besim se mund të vazhdojë ecurinë pozitive.
