Një mbrëmje e “veçantë” pritet në Stamford Bridge të martën në mbrëmje, pasi trajneri i Benficës, Jose Mourinho, do të shijojë rikthimin e tij në shtëpinë e Chelseat në fazën e ligës të Ligës së Kampionëve.
62-vjeçari do të drejtojë ndeshjen e tij të parë në këtë kompeticion me “Shqiponjat”, pikërisht në stadiumin ku ka shkruar histori, ndërsa të dyja skuadrat do të kërkojnë pikët e para në Evropë pas humbjes në javën e parë.
Pavarësisht se tashmë ka fituar çdo trofe të UEFA-s që ekziston – një arritje që asnjë klub tjetër evropian nuk mund ta mburret – rrugëtimi i Chelseat për t’u shpallur për herë të tretë kampion i Evropës nisi keq, me humbjen 3-1 ndaj rivalëve të finales së vitit 2012, Bayern Munich.
Kampioni gjerman mori hak për atë mbrëmje të hidhur në Munih 13 vite më parë, duke fituar bindshëm me dopietën e Harry Kane dhe autogolin e Trevoh Chalobah, ndërsa goli i bukur i Cole Palmer mbeti thjesht ngushëllim.
Chalobah vazhdoi të ishte “antiheroi” edhe në Premier League fundjavën e kaluar, kur kartoni i kuq i tij në fillim të pjesës së dytë ndezi përmbysjen spektakolare të Brightonit në Londër, duke i dhënë Chelseat një tjetër humbje 3-1, kësaj here ndaj ekipit të frymëzuar nga Danny Welbeck.
Me tre humbje në katër ndeshjet e fundit dhe vetëm një fitore në pesë takimet e fundit – ndaj Lincoln City në Kupën e Ligës – skuadra e Enzo Marescës duket se po paguan shtrenjtë suksesin veror në Shtetet e Bashkuara, përfshirë edhe një krizë të thellë mungesash.
Edhe më shqetësues është fakti se Chelsea ndodhet në një seri prej tre humbjesh radhazi në Ligën e Kampionëve – rekordi më negativ i tyre ndonjëherë – megjithatë një shifër ngushëlluese është që “Blutë” nuk janë mposhtur në shtëpi në fazën e grupeve të UCL që nga viti 2019.
Në anën tjetër, nuk mund të thuhet e njëjta gjë për Benficën, e cila në ndeshjen e fundit nën drejtimin e Bruno Lage u befasua me humbje 3-2 në shtëpi ndaj Qarabagut, pasi shpërdoroi një epërsi 2-0 në mënyrë katastrofike.
Ajo disfatë dramatike, që solli përmbysjen e pabesueshme të azerbajxhanasve, u konsiderua rezultat fatal nga bordi i klubit portugez, i cili vendosi ta shkarkojë Lagen dhe t’i besojë timonin një fytyre të njohur si Jose Mourinho.
