Duke synuar të shmangë humbjen e katërt radhazi në të gjitha kompeticionet, Chelsea udhëton drejt Hill Dickinson Stadium për t’u përballur me Everton në Premier League të shtunën në mbrëmje.
Blues synojnë të kompletojnë “double”-in në kampionat ndaj Toffees për herë të parë që nga sezoni 2016-17, pasi fituan 2-0 në përballjen e parë në Stamford Bridge tre muaj më parë.
Chelsea shkon në Merseyside në kërkim të një reagimi pas një jave shumë të vështirë, ku pësuan humbje 1-0 në shtëpi ndaj Newcastle në Premier League dhe dy disfata ndaj kampionëve të Champions League, Paris Saint-Germain, duke u eliminuar me rezultat të përgjithshëm 8-2.
Blues, që u mposhtën bindshëm 3-0 në shtëpi në ndeshjen e kthimit të mërkurën, kanë humbur katër ndeshje radhazi në fazat me eliminim direkt të Champions League për herë të parë në histori, duke rritur presionin mbi trajnerin Liam Rosenior.
Chelsea ka vetëm katër fitore në 11 ndeshjet e fundit në të gjitha kompeticionet (2 barazime, 5 humbje), përfshirë vetëm një fitore në pesë ndeshjet e fundit në Premier League (2 barazime, 2 humbje), duke rënë në vendin e gjashtë, edhe pse mbeten vetëm tre pikë larg vendit të katërt me tetë ndeshje të mbetura.
Problemet në mbrojtje vazhdojnë të jenë shqetësuese, pasi që nga ndeshja e parë e Rosenior në kampionat – fitore 2-0 ndaj Brentford – Chelsea ka pësuar gol në tetë ndeshje radhazi në Premier League, duke pranuar 11 gola.
Me ndeshje të vështira kundër Manchester City, Manchester United dhe Liverpool që po afrohen, Chelsea nuk mund të lejojë shumë gabime në këtë fazë vendimtare. Edhe pse nuk ka fituar në dy vizitat e fundit ndaj Everton në kampionat (1 barazim, 1 humbje), skuadra londineze ka një nga rekordet më të mira në transfertë këtë sezon (7 fitore, 4 barazime, 4 humbje).
