Vedat Muriqi nuk do të rikthehet te Fenerbahçe, të paktën jo në afatin kalimtar të janarit.
Klubi spanjoll Mallorca ka vendosur ta refuzojë ofertën e ardhur nga gjiganti turk për sulmuesin kosovar, duke e konsideruar atë si pjesë të panegociueshme të projektit sportiv.
Lajmin e ka bërë të ditur gazetari turk Sercan Hamzaoğlu, përcjell “Gazeta Express”.
Interesimi i Fenerbahçes për Muriqin ishte konkret, por drejtuesit e Mallorcës nuk kanë qenë të gatshëm të heqin dorë nga golashënuesi i tyre kryesor.
Forma e shkëlqyer e 31-vjeçarit dhe ndikimi i tij vendimtar në ekip kanë bërë që klubi ta mbyllë derën për çdo largim të mundshëm.
Muriqi po kalon një sezon shumë pozitiv në La Liga, duke shënuar gola të rëndësishëm dhe duke qenë lider i repartit ofanziv.
Ai i ka realizuar 14 gola në kampionatin spanjoll në këtë edicion duke e parë veten në vendin e dytë, prapa Kylian Mbappe, i cili i ka 19.
Në përgjithësi, prizrenasi i ka realizuar 48 gola, vetëm 6 prapa legjendarit Samuel Eto’o, i cili i kishte shënuar 54 gola me ekipin ishullor.
Përveç realizimit, përfaqësuesi kosovar ofron forcë fizike, eksperiencë dhe përkushtim maksimal – elemente që e bëjnë të pazëvendësueshëm për skuadrën.
Mallorca synon stabilitet dhe vazhdimësi, ndërsa mbajtja e Muriqit shihet si kyçe për objektivat e sezonit.
Refuzimi i ofertës nga Fenerbahçe është një sinjal i qartë se klubi spanjoll nuk ka ndërmend të dobësohet në mes të garës.
Nga ana tjetër, edhe vetë Muriqi është i fokusuar te Mallorca, ku e gëzon besimin e trajnerit, dashurinë e tifozëve dhe rolin e liderit në fushë.
Për momentin, rikthimi në Turqi mbetet vetëm një ide e parealizuar. /Gazeta Express
