Kampioni i Segunda Division, Levante, do të kërkojë ta befasojë kampionin në fuqi të La Ligës, Barcelonën, kur dy skuadrat të përballen në javën e dytë të sezonit 2025-26, të shtunën mbrëma.
Barcelona, e cila tashmë kryeson tabelën e La Ligës, e hapi sezonin me një fitore 3-0 ndaj Mallorcës që mbeti me nëntë lojtarë, ndërsa Levante e nisi rikthimin në elitë me një humbje 2-1 kundër Alaves.
Levante është kampione e Segunda Division, duke siguruar kështu kthimin në La Liga falë suksesit të vitit të kaluar, dhe tash synon të bëjë dy sezone radhazi në këtë nivel për herë të parë që nga viti 2022.
Skuadra e Julian Caleros e di mirë se këtë edicion do ta ketë shumë të vështirë, dhe disfata ndaj Alaves ishte zhgënjyese, sidomos duke pasur parasysh se baskët pritet të jenë rivalë direkt në luftën për mbijetesë.
“Bretkosat” kanë fituar vetëm gjashtë nga 45 përballjet e tyre të mëparshme kundër Barcelonës, duke treguar madhësinë e sfidës, edhe pse ndeshja e fundit mes tyre në prill 2022 ishte e ngushtë, me katalanasit që fituan 3-2.
Fitorja e fundit e Levantes ndaj Barcelonës daton në nëntor 2019, ndërsa një vit më herët, në maj 2018, ata ishin pjesë e një spektakli me nëntë gola kundër kampionëve, duke triumfuar 5-4 në fushën e tyre.
Skuadra nga Valencia ka qenë shumë aktive këtë verë në merkato, dhe afrimi më i madh në aspektin e shpenzimeve ka qenë Jon Ander Olasagasti nga Real Sociedad.
Sa i përket Barcelonës, kampionia në fuqi nuk u lodh aspak në ndeshjen hapëse të kampionatit 2025-26 ndaj Mallorcës, duke fituar bindshëm 3-0 në transfertë.
Barcelona shënoi dy herë brenda 23 minutave të para me Raphinhan dhe Ferran Torres, ndërsa Mallorca mbeti me dy lojtarë më pak në pjesën e parë. Kjo bëri që pjesa e dytë të ishte një formalitet për skuadrën e Hansi Flick, që vulosi fitoren me golin e tretë nga Lamine Yamal në minutat e fundit.
