Epërsia historike e Liverpoolit kundër PSV Eindhoven mund të mos vlejë shumë të mërkurën, kur “të kuqtë” e panjohshëm e presin kryesuesen e Eredivisies në ndeshjen e pestë të Champions League.
Kampionët në fuqi të Premier League i kanë fituar të tre përballjet e mëparshme kundër PSV-së në Anfield, por ndoshta asnjëherë nuk janë përballur me “Fshatarët” në një formë kaq të mjerueshme, duke i dhënë shpresë skuadrës së Peter Bosz para përballjes së tyre të tetë evropiane me klubin nga Merseyside.
Humbja 3-0 ndaj Nottingham Forest të shtunën ishte shembulli perfekt i “mbaje birrën”; Liverpooli me siguri nuk do të poshtërohej sërish dy javë pas humbjes 3-0 ndaj Manchester City, sidomos kundër një skuadre të Forest që i kishte mposhtur 1-0 sezonin e kaluar.
Nëse dikush mendoi se gjërat s’mund të shkonin më keq pas humbjes në Etihad para pushimit të nëntorit, atëherë u gabua. Forma e tmerrshme e skuadrës së Arne Slot u fundos edhe më thellë kundër ekipit të Sean Dyche, duke i lënë në pozitën e 12-të në tabelën e Premier League pas 12 javësh.
Edhe më keq është fakti se skuadra e Slot duket jo-funksionale në çdo repart: kthimi i Alisson Beckerit nuk e ndaloi skuadrën nga pësimi i tre golave në dy ndeshje radhazi të kampionatit për herë të parë që nga prilli i vitit 1965. Mbrojtja e udhëhequr nga Virgil van Dijk përbëhet nga Ibrahima Konate — i cili duket me mendje diku tjetër ndërsa flitet për kontratën që i skadon në 2026 — Milos Kerkez, të cilit fanella i duket shumë e madhe, dhe një boshllëk i madh i Trent Alexander-Arnold, pas largimit të tij te Real Madrid.
Dominik Szoboszlai, një nga lojtarët më të mirë këtë sezon, është detyruar të luajë disa herë në pozitën e mbrojtësit të djathtë, duke e lënë mesfushën e Liverpoolit — tashmë shumë të lehtë për t’u kaluar — pa lojtarin e saj më të mirë deri tani. Ndërsa për sulmuesit, s’ia vlen as të flitet.
Në sulm, Mohamed Salah është hija e lojtarit që u rendit i katërti në Topin e Artë 2025, ndërsa ardhja e Alexander Isak ka bërë më shumë dëm sesa dobi, pasi Slot po lufton të gjejë mënyrën se si ta kombinojë atë me Hugo Ekitike në majë të sulmit. Florian Wirtz ende nuk e ka gjetur ritmin në Angli.
Pasojë e gjithë këtyre problemeve është një tjetër mbrojtje e dështuar e titullit kampion — përveç nëse ndodh një mrekulli — dhe madje edhe një luftë për ta siguruar pjesëmarrjen në Champions sezonin e ardhshëm, përveç nëse e fitojnë këtë edicion.
Në Champions League, në kontrast me formën në Premier League, Liverpooli deri tani ka bërë mirë, duke fituar tre nga katër ndeshjet dhe duke u renditur në vendin e tetë — pozita e fundit që siguron kualifikimin direkt në fazën me eliminim.
