Anglia e mbyll fushatën e kualifikimeve për Kupën e Botës 2026 me një super përballje në krye të grupit, duke udhëtuar drejt Tiranës për t’u ndeshur me Shqipërinë të dielën.
Vizitorët, tashmë të kualifikuar për Botërorin në Amerikën e Veriut, synojnë ta mbyllin grupin me tetë fitore nga tetë ndeshje, ndërsa Shqipëria siguroi vendin në playoff me një fitore të ngushtë ndaj Andorrës në mesjavë.
Kushtet atmosferike ishin të vështira të enjten, por jo edhe finalizimi, pasi Anglia vazhdoi ecurinë perfekte në kualifikime me dy super gola nga Bukayo Saka dhe Eberechi Eze në fitoren 2-0 ndaj Serbisë.
Dyshja e Arsenalit i dhuroi Tre Luanëve një fitore rutinë në shtëpi kundër rivalëve të Euro 2024, takim që nuk ndikoi në renditje, pasi Anglia ishte kualifikuar që në tetor – duke u bërë kombëtarja e parë nga UEFA që siguroi biletën për Botëror.
E pamposhtur dhe pa pësuar gol, Anglia është një nga vetëm tre ekipet evropiane që ende nuk ka lejuar gol në këtë fazë, krahas Spanjës dhe Zvicrës, që kanë luajtur tre ndeshje më pak.
Tani, të udhëhequr nga Thomas Tuchel, anglezët ndjekin historinë: mund të vendosin rekord të ri kombëtar me 11 fitore radhazi në ndeshje zyrtare, pasi barazuan rekordin e mëparshëm prej 10 të enjten.
Po ashtu, Anglia ka plot nëntë ndeshje radhazi pa pësuar gol në kompeticione zyrtare dhe mund të bëhet ekipi i dytë evropian që arrin 10 fitore rresht pa pësuar, pas Spanjës (2014–2016).
Edhe Shqipëria po kalon formë të mirë në mbrojtje – fitorja ndaj Andorrës ishte clean sheet i katërt në pesë ndeshje. Goli i vetëm i ndeshjes u shënua nga Kristjan Asllani në mes të pjesës së dytë, një rezultat që, i ndihmuar edhe nga fitorja e Anglisë ndaj Serbisë, i vulosi kuqezinjve vendin e dytë dhe mundësinë për të luajtur në playoff.
