Vjen momenti i “pauzës” së detyruar edhe për Naser Alijin. Mbrojtësi i Kombëtares shqiptare, alternativa e parë për Mario Mitajn në krahun e majtë të prapavijës, do të jetë i detyruar t’i nënshtrohet një ndërhyrje kirurgjikale për shkak të problemeve fizike.
Mbrojtësi luajti sot përballë Elbasanit me fanellën e Dinamos, duke mbajtur edhe shiritin e kapitenit. Por pas ndeshjes, trajneri Ilir Daja bëri të qartë se lojtari duhet të operohet për shkak të problemeve me pubalgjinë që e kanë kushtëzuar shumë.
“Ngarkesa që ka Aliji është shumë e madhe dhe mund ta humbasim Aljin për një periudhë dymujore, se ka probleme me pubalgjinë dhe mund të operohet, e ka luajtur i sforcuar”, shpjegoi Daja pas duelit.
Kësisoj, pritet që Aliji të kryejë ndërhyrjen kirurgjikale për të shmangur probleme të mëtejshme, në një periudhë ku shihet qartësisht që ajo është planifikuar në mënyrë të tillë që të jetë në formën optimale në fundin e muajit mars, kur luhen sfidat e play-off të Kombëtares për kualifikimin në Botëror.
PANORAMASPORT.AL
