Mesfushori Enis Shabani mund të përjetojë një verë të nxehtë, pasi emri i tij ka filluar të qarkullojë te shumë nga klubet e njohura kroate, të cilat e shohin si një përforcim për merkaton për vitin e ardhshëm.
Futbollisti 23-vjeçar, i cili në fillimin e edicionit u largua nga Mainc në Gjermani dhe iu bashkua Vukovarit në kampionatin kroat, ka lënë një përshtypje shumë të mirë duke luajtur me ekipin e ngjitur në elitë, por që rrezikon seriozisht rënien.
Kjo ka bërë që interesi për Shabanin të shtohet nga klubet e tjera dhe sipas “Index.hr” janë Slaven Belupo, Osijek, Istra, Gorica, Lokomotiva Zagreb dhe Rijeka që kanë shfaqur interes për trasnfierimin e tij në verë, gjë që do të ishte një hap i rëndësishëm në karrierë për mesfushorin.
Shabani ishte pjesë e përfaqësuesve të moshave të Gjermanisë, por zgjodhi t’i bashkohej Shqipërisë U21 në kualifikueset e Europianit të edicionit të kaluar, duke luajtur disa ndeshje me të. Transferimi në një klub më të rëndësishëm në Kroaci, mund t’i hapte dyert atij për t’u bërë pjesë e Kombëtares A në të ardhmen.
PANORAMASPORT.AL
