E ardhmja e Mohamed Salahut vazhdon të jetë një nga temat më të diskutuara në tregun e transferimeve, ndërsa sulmuesi egjiptian ka marrë një ofertë marramendëse nga klubi saudit Al-Ittihad.
Sipas raportimeve të Ahmed Mubarak, Al-Ittihad i ka paraqitur yllit të Liverpoolit një propozim financiar që mund t’i sigurojë të ardhura vjetore më të larta sesa ato që përfiton aktualisht Cristiano Ronaldo te Al Nassr.
Nëse marrëveshja realizohet, Salah mund të bëhet futbollisti më i paguar në Arabinë Saudite, duke kaluar edhe fitimet e superyllit portugez. Ky zhvillim tregon edhe një herë ambiciet e mëdha të klubeve saudite për të tërhequr emrat më të mëdhenj të futbollit botëror.
Salah ka qenë prej vitesh një nga figurat kryesore të Liverpoolit, duke fituar trofe të rëndësishëm dhe duke u shndërruar në një nga lojtarët më të dashur për tifozët e klubit anglez. Megjithatë, interesimi i vazhdueshëm nga Arabia Saudite mund të ndikojë në vendimin e tij për të ardhmen.
Deri më tani nuk ka një përgjigje zyrtare nga kampi i lojtarit, por oferta e Al-Ittihad konsiderohet ndër më të mëdhatë që i është bërë ndonjëherë një futbollisti në historinë e sportit.
Tashmë mbetet për t’u parë nëse Salah do të vendosë të vazhdojë karrierën në futbollin evropian apo do të tundet nga oferta rekord që vjen nga Lindja e Mesme.
