Duke synuar të marrin kreun e Serie A – të paktën për një ditë – AC Milan do të përballet me Parmën në vështirësi këtë të shtunë në mbrëmje.
Ndërsa Napoli, Roma dhe Interi përgatiten për ndeshjet e së dielës, “Rossonerët” mund të ngjiten në vendin e parë me një fitore në “Stadio Tardini”.
Pas dy barazimeve zhgënjyese, Milani reagoi me një fitore të bujshme fundjavën e kaluar, duke qëndruar vetëm një pikë larg Napolit pas 10 javësh kampionat.
Dy momente magjie vendosën përballjen e tensionuar me Romën në favor të Milanit: Rafael Leao realizoi një depërtim spektakolar për të asistuar Strahinja Pavloviçin para fundit të pjesës së parë, ndërsa kapiteni Mike Maignan u bë portieri i parë që ndal Paulo Dybalan nga penalltia që prej vitit 2021.
Tashmë, “Rossonerët” janë të pamposhtur në 10 ndeshje radhazi në të gjitha kompeticionet dhe ndodhen në vendin e katërt të Serie A, ngjitur me tre skuadrat që kanë angazhime evropiane.
Si gjithmonë pragmatist, trajneri Massimiliano Allegri këmbëngul se është ende herët për të folur për garën për “Scudetto”, por skuadra e tij është padyshim pjesë e betejës për titull.
Menjëherë pas pushimit ndërkombëtar, derbi i madh “della Madonnina” ndaj Interit do të testojë plotësisht ambiciet e Milanit, por përpara kësaj, Allegri duhet të sigurojë që ekipi i tij të bëjë detyrën në Parma.
Historia është në anën e tyre, pasi Milani ka fituar shtatë nga 10 përballjet e fundit në kampionat mes dy skuadrave, duke humbur vetëm një.
E vetmja fitore e Parmës në këtë periudhë erdhi në fillim të sezonit të kaluar, kur ata triumfuan ngushtë 2-1 në “Tardini”.
