Jose Mourinho ishte sërish në formën e tij më provokuese pas fitores bindëse 3-0 të Real Madridit ndaj Racing Santander të dielën pasdite.
Pavarësisht atmosferës armiqësore, trajneri portugez e shfrytëzoi rastin për t’u tallur me tifozët vendas për mungesën e njohurive të tyre rreth rregullave të lojës.
Real Madridi siguroi tri pikë të rëndësishme në udhëtim, por titujt kryesorë pas ndeshjes u dominuan nga ironia karakteristike e Mourinhos.
Ish-trajneri i Chelseat dhe Interit nuk u frikësua aspak nga atmosfera në stadiumin “El Sardinero”, duke zgjedhur që gjatë konferencës për media pas ndeshjes t’i kritikonte protestat e vazhdueshme të tifozëve vendas.
“E dua këtë stadium dhe i dua tifozët e Racingut. Ata nuk vijnë për të ndjekur një shfaqje apo për të parë një film, por vijnë për të marrë pjesë në ndeshje dhe për t’ua vështirësuar shumë punën kundërshtarëve”, shpjegoi Mourinho.
Megjithatë, toni i tij ndryshoi kur foli për fishkëllimat e vazhdueshme nga tribunat.
“Ata protestuan për çdo vendim të gjyqtarit, sidomos sepse nuk i njihnin mirë rregullat. Dhe natyrisht, i kuptoj, sepse rregullat ndryshojnë shumë”, shtoi ai me një dozë të madhe ironie.
Tensioni në stadium arriti kulmin kur Racing Santander mendoi se kishte fituar mundësinë për t’u rikthyer në lojë përmes një penalltie. Megjithatë, ndërhyrja e VAR-it bëri që vendimi të anulohej, duke shkaktuar zemërim te tifozët vendas.
Komentet e Mourinhos u përqendruan kryesisht te penalltia e anuluar, të cilën ai e konsideronte si një shembull të qartë se si teknologjia po funksionon pikërisht ashtu siç duhet. Trajneri portugez këmbënguli se skuadra vendase nuk kishte të drejtë të përfitonte nga një penallti sipas rregullave aktuale.
“Ata protestuan për këtë penallti të anuluar, kur ishte e qartë se rregulli thotë që në atë rast nuk ka asnjëherë penallti. Ishte shumë e qartë, përderisa VAR-i nuk ishte në gjumë. Dhe fatmirësisht, VAR-i ishte zgjuar. Gjyqtari ishte shumë i mirë”, vazhdoi Mourinho.
Në fushë, gjithçka ishte shumë më e qartë, pasi yjet e Real Madridit përfundimisht e mposhtën kundërshtarin. Kylian Mbappe vazhdoi rekordin e tij të jashtëzakonshëm në futbollin spanjoll, duke ruajtur serinë perfekte të golave kundër çdo kundërshtari me të cilin është përballur në La Liga.
Ndërkohë, Jude Bellingham – i cili u bë anglezi i parë në histori që shënon 50 gola për klubin – dhe Yan Diomande kontribuuan për ta bërë edhe më bindëse fitoren e madrilenëve.
Ky rezultat ishte shumë i rëndësishëm për Real Madridin, në mënyrë që të vazhdojë presionin ndaj rivalëve për titullin e kampionit. Madrilenët tani renditen në vendin e tretë në tabelën e La Ligës me 27 pikë, vetëm një pikë prapa Atletico Madridit të vendit të dytë dhe tri pikë larg liderit Barcelona.
Real Madridi tani do ta zhvendosë vëmendjen te ndeshja e së mërkurës në Ligën e Kampionëve kundër AEK Athens, përpara përballjes së së shtunës me Valencian, në ndeshjen e fundit para pushimit për ndeshjet e kombëtareve./GazetaExpress/
