Pasi i shpëtuan dy situatave tepër të vështira, Argjentina do të vazhdojë mbrojtjen e titullit të saj të shtunën, kur përballet me Zvicrën në çerekfinalet e Kupës së Botës 2026.
Duke iu afruar gjithnjë e më shumë një titulli të dytë radhazi, La Albiceleste mund të sigurojë një vend në gjysmëfinale ndaj fituesit të përballjes Angli – Norvegji, nëse mposht Zvicrën në Kansas City.
Parashikimi i ndeshjes
Pasi doli me shumë vështirësi nga përballja me debutuesit e Kepit të Gjelbër në raundin e parë me eliminim direkt, Argjentina u gjend në një situatë edhe më të ndërlikuar në ndeshjen e fundit.
Egjipti kryesonte 2-0 deri 11 minuta para fundit të kohës së rregullt, por një rikthim spektakolar – i shoqëruar edhe me disa vendime të diskutueshme të VAR-it – ndryshoi plotësisht fatin e ndeshjes.
Cristian Romero ngushtoi diferencën, Lionel Messi u rehabilitua pasi kishte humbur më herët një penallti duke shënuar golin e barazimit, ndërsa Enzo Fernandez realizoi golin e fitores, duke i dhuruar edhe një herë tifozëve argjentinas emocione të paharrueshme.
Kjo ishte fitorja e 12-të radhazi e Argjentinës që nga shtatori i kaluar, ndërsa tashmë skuadra ndodhet vetëm tre fitore larg një tjetër triumfi botëror.
Edhe pse Messi dhe disa prej lojtarëve kryesorë kanë treguar shenja të kalimit të viteve, kombinimi i përvojës, cilësisë teknike dhe karakterit luftarak ka qenë vendimtar për rrugëtimin e tyre deri në këtë fazë.
Që nga humbja tronditëse ndaj Arabisë Saudite në ndeshjen hapëse të Botërorit 2022, Argjentina është e pamposhtur në 11 ndeshje të Kupës së Botës, duke shënuar të paktën dy gola në secilën prej tyre – seria më e mirë në historinë e saj në këtë kompeticion.
Historia gjithashtu favorizon amerikanolatinët. Argjentina ka fituar të dyja përballjet me Zvicrën në turne madhorë: 2-0 në Botërorin e vitit 1966 dhe 1-0 në Brazil 2014, falë golit të Angel Di Marias në kohën shtesë.
Përfshirë ato sfida, Zvicra nuk ka arritur kurrë të mposhtë Argjentinën në shtatë përballje gjithsej, çka tregon qartë madhësinë e sfidës që e pret.
Me synimin për të arritur për herë të parë në histori në gjysmëfinalet e Kupës së Botës – pasi hera e fundit që arriti deri në çerekfinale ishte në vitin 1954 si vend organizator – Zvicra ka zhvilluar një turne solid, edhe pse jo spektakolar.
Skuadra e Murat Yakinit e nisi Botërorin me një barazim zhgënjyes ndaj Katarit, por reagoi duke mposhtur Bosnje-Hercegovinën 4-1 dhe më pas bashkëorganizatorët Kanadanë 2-1.
Pas kualifikimit si fituese e Grupit B, Zvicra eliminoi Algjerinë dhe më pas kaloi Kolumbinë pas goditjeve të penalltive.
Pas një barazimi pa gola në Vancouver, portieri Gregor Kobel u shndërrua në heroin e skuadrës, duke udhëhequr zviceranët drejt një fitoreje 4-3 nga pika e bardhë.
Trajneri Murat Yakin njihet për pragmatizmin e tij, duke i dhënë përparësi organizimit mbrojtës mbi lojën sulmuese, dhe kjo filozofi ka funksionuar. Zvicra nuk ka qenë asnjëherë në disavantazh gjatë gjithë fushatës së Botërorit 2026, përfshirë edhe ndeshjet kualifikuese.
Tashmë, si njëra nga gjashtë kombëtaret evropiane që kanë mbetur në mesin e tetë më të mirave, zviceranët duhet të eliminojnë kampionët në fuqi nëse duan të shkruajnë kapitullin më të madh në historinë e futbollit të tyre.
