Arsyeja e vërtetë pse Michael Olise u largua nga akademia e Chelseat është zbuluar, ndërsa anësori vazhdon të dëshmojë se është një nga futbollistët më të mirë në botë gjatë Kupës së Botës këtë verë.
Ylli i Bayern Munich dha dy asistime në fitoren 3:0 të Francës ndaj Suedise në fazën e 1/16 së finales të hënën mbrëma.
Me gjithsej pesë asistime, Olise kryeson bindshëm listën e asistuesve më të mirë të turneut. Megjithatë, kjo nuk është diçka e re për 24-vjeçarin, i cili ka treguar vazhdimisht cilësinë e tij ndër vite, veçanërisht gjatë periudhës te Crystal Palace në Premier League. Falë paraqitjeve të fundit, ai tashmë është futur seriozisht në diskutimet për fitimin e Topit të Artë.
Për këtë arsye, Olise konsiderohet si një tjetër talent i madh që Chelsea e la të largohej shumë lehtë. Sot, shumëkush e ka të vështirë ta kuptojë atë vendim, ndërsa klubi londinez vazhdon të kërkojë përforcime në repartin ofensiv.
Olise u zhvillua si futbollist te Reading në ligat e ulëta angleze, përpara se të shpërthente te Crystal Palace dhe më pas të transferohej te Bayern Munich në vitin 2024. Megjithatë, Reading ishte klubi që i dha mundësinë pasi më parë ai kishte kaluar në akademitë e Arsenalit, Chelseat dhe Manchester Cityt.
José Gomes, trajneri i atëhershëm i Readingut, ishte ai që pa potencialin e Olises dhe madje e pengoi largimin e tij edhe nga ky klub.
“Para se të mbushte 14 vjeç ishte në akademinë e Arsenalit, por nuk u përshtat,” tha Gomes për AS, në kohën kur Olise lidhej me një transferim te Real Madridi.
Ai zbuloi edhe arsyen pse Chelsea vendosi ta largonte:
“Chelsea e largoi për të njëjtën arsye që disa donin ta largonin edhe nga Readingu: sepse nuk ndiqte mësimet dhe nuk i kushtonte vëmendje studimeve.”
Gomes mbrojti futbollistin kur e ardhmja e tij ishte në rrezik, duke u thënë drejtuesve të akademisë:
“Djali nuk dëshiron të bëhet matematikan apo inxhinier, por futbollist.”
Trajneri portugez tregoi edhe arsyen pse aventura e Olises te Manchester City mori fund:
“Te City ishte ndryshe. Shokët e skuadrës talleshin me të. Ai kishte krahë të dobët, ndërsa djemtë anglezë ishin shumë më të fuqishëm fizikisht. Kur trajneri i përgatitjes fizike u kërkonte të bënin pompa, ai e kishte shumë të vështirë dhe shokët e tallnin. U ndje i poshtëruar dhe vendosi të largohej.”
