Real Madrid do të synojë të regjistrojë fitoren e katërt radhazi në nisje të sezonit 2025-26 të La Ligas, kur të udhëtojë drejt “Reale Arena” këtë të shtunë për t’u përballur me Real Sociedad.
Los Blancos kryesojnë tabelën me nëntë pikë të plota nga tre ndeshjet e para, ndërsa Real Sociedad ndodhet në vendin e 16-të me vetëm dy pikë të mbledhura deri më tani.
Sezoni i kaluar ishte zhgënjyes për skuadrën baske, e cila e mbylli kampionatin në vendin e 11-të – pozicioni më i ulët që nga viti 2018. Kësisoj, pritjet për një përmirësim këtë sezon janë të mëdha.
La Real e nisi kampionatin me një barazim 1-1 kundër Valencias, më pas barazoi 2-2 ndaj Espanyolit, ndërsa në ndeshjen e fundit përpara pushimit ndërkombëtar humbi 1-0 kundër Real Oviedos.
Në merkato, klubi nuk bëri shumë lëvizje të mëdha. Përforcimi më i shtrenjtë ishte Yangel Herrera nga Girona, ndërsa largimi kryesor ishte ai i Martin Zubimendit drejt Arsenalit.
Megjithatë, Real Sociedad arriti të mbajë disa nga yjet kryesorë si Takefusa Kubo dhe Mikel Oyarzabal, pavarësisht interesimit të madh për ta gjatë verës.
Në krahun tjetër, Real Madrid ka siguruar tre fitore radhazi kundër Osasunës, Real Oviedos dhe Mallorcës, duke shënuar gjashtë gola dhe duke pësuar vetëm një.
Edhe pse skuadra e Xabi Alonsos ende nuk ka gjetur ritmin e saj më të mirë, fakti që fiton edhe kur nuk luan në maksimum është tregues i forcës së saj.
Me një fitore këtë fundjavë, madrilenët do të shkëputeshin pesë pikë nga Barcelona kampione në fuqi, duke i dhënë një sinjal të qartë garës për titull.
