Suedia do të kërkojë të rifillojë nga e para fushatën e saj të kualifikimeve për Kupën e Botës, kur të presë Kosovën në Goteborg këtë të hënë mbrëma.
Suedezët ndodhen aktualisht në fund të Grupit B, me vetëm një pikë të vetme nga tre ndeshjet e para, ndërsa Dardanët janë plotësisht në garë për një kualifikim historik.
Shpresat e Suedisë për të siguruar një biletë drejt Amerikës së Veriut verën e ardhshme varen në një fije të hollë pas një nisjeje tejet të dobët në grupin e tyre kualifikues.
Suedezët e nisën fushatën me një barazim 2-2 në udhëtim kundër Sllovenisë, por më pas pësuan dy humbje radhazi – ndaj Kosovës dhe, së fundmi, ndaj Zvicrës.
Presioni mbi trajnerin Jon Dahl Tomasson është në nivelin më të lartë ndonjëherë, pasi tifozët shfaqën pankarta të ashpra gjatë humbjes së së premtes kundër Zvicrës – njëra prej tyre kërkonte dorëheqjen e trajnerit, ndërsa tjetra e ofendonte hapur me fjalët “Danish b*****d”.
Një nga mediat sportive më të njohura në Suedi, Sportbladet, zhvilloi një sondazh për të pyetur lexuesit nëse Tomasson duhet shkarkuar pas këtij fillimi zhgënjyes, dhe jo çuditërisht, 90% e mbi 40 mijë votuesve kërkuan largimin e tij.
Sueda ka arritur të kualifikohet vetëm në një nga katër Kupat e fundit të Botës, dhe megjithëse Tomasson i siguroi tifozët se kualifikimi është ende i mundur, shumica e tyre nuk duken aspak të bindur për të bërë planet e udhëtimit drejt Amerikës së Veriut.
Sa i përket ndeshjes së së hënës, Suedia do të kërkojë hakmarrje pas humbjes 2-0 ndaj Kosovës muajin e kaluar – një disfatë që do të mbahet mend si një nga më befasueset në historinë e futbollit modern suedez.
Sa për Kosovën, Dardanët dëshmuan se fitorja ndaj Suedisë nuk ishte rastësi, pasi e pasuan triumfin e madh me një barazim inkurajues pa gola ndaj Sllovenisë.
