Portugalia do të përpiqet ta ruajë ecurinë e përsosur në kualifikimet për Kupën e Botës 2026, kur të presë Irlandën në “Estadio Jose Alvalade” të shtunën në mbrëmje.
Këto dy përfaqësuese do të përballen për herë të parë që nga qershori i vitit 2024, kur Cristiano Ronaldo shënoi dy gola në fitoren e lehtë 3-0 për “Selecao das Quinas” në një ndeshje miqësore në tokën portugeze.
Pas fitores historike në Ligën e Kombeve në muajin qershor, Portugalia e nisi në mënyrë ideale fushatën e kualifikimeve për Botërorin me dy fitore radhazi ndaj Armenisë dhe Hungarisë, duke shënuar plot tetë gola në total.
Në ndeshjen e parë, Portugalia fitoi me rezultat bindës 5-0 në udhëtim kundër Armenisë, ndërsa më pas, ndaj Hungarisë, siguroi tri pikët falë golit të vonshëm të Joao Cancelos në minutën e 86-të, duke triumfuar 3-2.
“Selecao das Quinas” është duke punuar drejt një ëndrre – fitimit të Kupës së Botës për herë të parë në histori. Trajneri Roberto Martinez ka deklaruar se “beson në numrat”, duke iu referuar veçanërisht numrit gjashtë, që simbolizon paraqitjen më të mirë të Portugalisë në Botërorin e vitit 1966 dhe triumfin në Euro 2016.
Si komb i renditur i pesti në botë, Portugalia e ka siguruar tashmë një vend në fazën “playoff” falë suksesit në Ligën e Kombeve, por aktualisht është në pozicionin ideal për të mbyllur Grupin F në vendin e parë, pasi ka tre pikë më shumë se ndjekësit më të afërt.
Skuadra e Martinez është në kërkim të fitores së gjashtë radhazi në të gjitha garat dhe me formën që po kalon, pritet të jetë favorite edhe në këtë përballje, sidomos pasi ka fituar tre nga katër ndeshjet e fundit ndaj Irlandës (një barazim).
Irlanda, nga ana tjetër, nuk është kualifikuar për Kupën e Botës që nga viti 2006 dhe tashmë e ka shumë të vështirë të sigurojë një vend në Botërorin e vitit 2026, pasi ka vetëm një pikë nga dy ndeshjet e para në Grupin F.
“The Boys in Green” barazuan 2-2 me Hungarinë në ndeshjen e parë, megjithëse ishin në disavantazh prej dy golash, por më pas u mposhtën 2-1 në Armeni nga një ekip i renditur 45 vende më poshtë në renditjen e FIFA-s – një rezultat që ka shtuar presionin mbi trajnerin dhe lojtarët irlandezë.
